معاناة طبيب أسنان في مستشفي حكومي

مكنتش عاوز اكتب بس فاض بيا بقي

مش عارف الاقيها منين ولا منين

بعيدا عن المرتب الحقير اللي مبيجيبش تمن السجاير

باقول مفيش مشكلة , واعتبر نفسي باشتغل للناس واجري علي الله

لكن الاسوأ من كده حاجات تانيه كتير باواجهها كل يوم باروح فيه المستشفي

اولا : العيان المتفزلك

كل عيان جاي بيتفزلك , وعامل نفسه ابو العريف

جاي مشخص حالته ورافض حتي النصيحة

يجيلي واحد اكشف عليه , الاقي فيه خراج تحت الضرس

اقوله: طيب يا حج هتاخد دوا 3 ايام وتيجي

يقولي لا انا عاوز اخلع

اقوله يا حج مش هينفع فيه خراج

يقولي بكل فزلكة , لا لا مفيش خراج ولا حاجة 

ساعتها دمي يفور 

والله ما هينفع يا حج فيه خراج

الاقيه مصمم يخلع, 

طبعا لازم اتعصب واتنرفز وارزع الادوات واسيبه وامشي

ده حاله من حالات الفزلكة

في حالات تانيه زي اللي واخد دوا سيوله دم وعاوز يخلع واقوله مينفعش وزي اللي قبله

وزي كتير اوي بييجوا معاهم ابنهم عنده 3 او 4 سنين ومصمم يخلعله ضرس, اقعد نص ساعة اقنعه انه لسه صغير ومينفعش يخلع دلوقتي

ده غير اللي ضغطه عالي او السكر عالي , حاجه تجيب الضغط والسكر

ثانيا : العيان الخايف من الفال الوحش والحسد

تخيل, عيان خايف الطبيب يحسده

اه والله

مثلا , عيان جه قعد علي الكرسي

قبل ما اشتغل باسأله عنده اي امراض ضغط , سكر, كبد او بياخد اي ادوية

المهم تلاقي رده كأنه بيقولك انت بتفَوِل عليا( بتفول عليا جايه من الفأل السيء)

تلاقيه بيرد لا معنديش حاجه الحمد لله ربنا يحفظنا وعنيه بتبصلك بشرار طالع منها 

ثالثا : اخفاء المرض

عيانين كتييير مابيرضوش يقولوا عندهم مرض لسبب مش عارفه لغاية دلوقتي

وتكتشف بالصدفة , مثلا تلاقي بعد الخلع نزيف مابيقفش

وساعات بتعرف بالخبرة من شكله او اعراض ظاهره عليه

رابعا : العيان المقزز

طبعا فيه عيانين كتير بييجوا ينضفوا سنانهم من الجير مع اختلاف كميته وكثافته وشكله

اتعودت اني ما اقرفش , واعصر علي نفسي ليمونة واستحمل كمان الريحة

لكن مش لدرجة ان ميبقاش فيه احساس بان انا مدرستش الطب علشان انضف بقايا الاكل

تلاقي عيان جايلك عنده جير وعاوز ينضفه , ولسه واكل حالا قبل ما يدخلك

فبأضر اديله علاج واقوله اغسل سنانك كويس 3 ايام وتعالي انضفلك الجير

تلاقيه متضايق وانتو مش راضيين تعملولي حاجه وانتو مش عارف ايه

وانا مش عاوز اجرحه بكلامي واقوله انت اللي معفن ومش مراعي ان فيه بني ادم هيفتح بقك

خامسا: العيان المستبيَع

تلاقي ضرسه مسوس تسوس بسيط بيوجعه مع الساقع والمسكر بس, وهو مصمم يخلعه

ياعم يهديك يرضيك حرااام , الضرس كويس , مفيييييش

اكتشفت انها ثقافة منتشرة في الشعب المصري

حتي بيعملوا كده مع اولادهم, جاي يخلعله ضرس دائم وهو عنده 12 سنه ومصمم برضه يخلع

سادسا : العيان الاووفر

ده بيبقي خايف من خياله, من غير ما المسه بيتوجع, بيطلع عين اللي جابوني

ده غير انه كل شويه يبعدني بايده, وساعات بيخليني أشك نفسي او اعور نفسي بسببهم

سابعا : الاطفال

وآه من الأطفال, بجد نفسي ما اشتغلش اطفال تاني ابداً ابداً

غير كل اللي فات ده

طبعا الشغل الحلمنتيشي اللي بينقل امراض , وللاسف مليش دخل فيه , ولكن ضمير الواحد بيعذبه بس هيعمل ايه , الوزارة منفضة

غير الحاجات اللي ساعات بتطرطش علي وشي او هدومي ايا كان نوع السائل "دم - لعاب - مزيج - قطع جير" يعني كولكشن جميل

غير طبعا الادوات والكراسي الكهنة , اما مبتتحركش او مفيش اضاءة , او مبتشغلش اي حاجه, او مفيهاش ميه, وانت لازم تتأقلم مع ظروف عملك

وفي الاخر العيان مابيقدرش اي حاجه من اللي بنستحملها علشانه, ولا الوزارة المحترمة بتقدر

حسبي الله ونعم الوكيل

أضف تعليقك,ايه رأيك؟؟؟